Suspected shabu, pusil na-recover sa drug buy bust operation sa Molo
ILOILO CITY — Duha ang nadakpan sa drug buy bust operation sa North San Jose, Molo kahapon, Oktubre 9.
Ginkilala ang mga nadakpan kanday alyas Mokong, 39-anyos nga residente sang Zone 1 Brgy North San Jose, Molo, kag alyas Russel, 38-anyos sang Brgy. Calaparan, Arevalo.
Suno kay Police Captain Ryan Christ Inot, hepe sang Molo Police Station, gin-monitor nila ang illegal activities sang duha tungod sang impormasyon nga nabaton halin sa mga pumuluyo tubtob na-verify.
Ang duha ka nadakpan ang nagabaligya sang illegal drugs sa lugar kag nagalab-ut man sa iban nga area sa syudad, suno sa police.
Si Mokong ang nagatago sang shabu kag si Russel ang may mga koneksyon sa manugbakal sa guwa sang barangay nga nagakadto lang sa amo nga lugar, suno sa police.
Natyempuhan kaina suno sa police nga nagahimos ang duha para magbaligya pa kun tani sang illegal drugs sa ila customer pero nadakpan.
Na-recover ang 50 grams sang suspected shabu nga may standard drug price nga P340,000.
Nakuha man kay Russel ang .38 caliber revolver kag anum ka mga bala.
Sa pagpangusisa sang police, napreso na si Russel sa kaso nga robbery kag siya ang ginatudlo nga nagapangkawat sang kagamitan sang mga estudyante sa West Timawa. — via Aksyon Farrah Mae Morano
