E-tap machine sa guwa sang mall gin-ransak

ILOILO CITY — Naglab-ot sa P340,190 ang nakuha sa e-tap machine sa guwa sang Atrium Mall sa City Proper nga ginransak mga las-6 kahapon sang aga, Oktubre 9.

Suno kay Police Captain Roque Gimeno III, hepe sang Iloilo City Police Station 1, las-9:25 sang aga na-report sa ila ang insidente pagkatapos gin-check sang empleyado sang tenant nga naga-arkila sang machine.

Nakita sa CCTV camera sa atubang sang mall ang lalaki nga nakasuksok sang jacket, full-face helmet kag may backpack ang lalaki nga nagsulod sa booth kun diin ang machine. May CCTV camera man nga naka-capture sang pagsakay sang suspect sa awto nga puti pagkatapos sang pagpang-ransak.

May security guard nga nagabantay sa guwa sang mall suno kay Gimeno pero posible wala niya natalupangdan nga ginabuksan na ang machine.

Sa imbestigasyon sang police, ginguba sang suspect ang slot kun diin ginahulog ang kwarta kun mag-cash in kag bolt cutter ang gingamit para gub-on ang kandado nga gindala sang suspect tungod wala sang nakita sa lugar.

Nagapadayon pa ang hot pursuit operation sang kapulisan agud madakpan ang suspect.– via Aksyon Maria Kayla Tingzon