2 ka bata nga gin-report nga missing sa Baldoza, La Paz nakit-an

ILOILO CITY — Nakit-an sa sulod sang abandonado nga salakyan kaina sang aga ang duha ka bata nga gin-report nga missing sa Brgy. Baldoza, La Paz.

Suno kay Rolly dela Cruz, tag-iya sang salakyan, masobra anum na ka tuig nga abandonado ang iya salakyan.

Pasado las-6 subong nga aga, nabatian ni Dela Cruz nga may nagagahod sa sulod sang salakyan kag sang gin-check niya, nakit-an ang bata nga babaye sa front seat.

Nagpangayo sang bulig si Rolly sa mga barangay kagawad kag ginbululigan nga makuha ang duha ka bata sa sulod sang salakyan. Wala nakahibalo si Rolly nga indi mabuksan ang pwertahan sa likod sang salakyan gani nagkuha sang bara kag ginbuka ang bintana sa front seat.

Nabuksan ni Kagawad Jerry Dunlao ang pwertahan sa passenger side kag nakaguwa ang duha ka bata.

Gilayon nagtawag sang Iloilo City Emergency Responders (ICER) ang mga barangay officials agud mausisa ang kahimtangan sang duha ka mga menor-de-edad.

Nagpangabay ang ginikanan sang babaye nga bata nga indi magpa-interview tungod na-trauma ang ila bata sa natabo. — via Aksyon Paula Elambayo