Mag-asawa patay sang nabungguan sang van ang motorsiklo nga ila ginasakyan sa Tigbauan

ILOILO — Patay ang mag-asawa sang nabungguan sang salakyan ang motorsiklo sa Brgy. Buyu-an, Tigbauan subong nga aga.

Suno kay Police Captain Alfred Mansoy, hepe sang Tigbauan Municipal Police Station halin sa Tigbauan kag pakadto sa Guimbal ang salakyan nga ginamaneho ni Rommy Galas, 59-anyos nga residente sang Alameda, Igbaras sang nadulaan siya sang kontrol sa iya manibela sang ginlikawan ang tricycle nga naka-park sa kilid sang dalan kag nagbunggo sa nagapadulong nga motorsiklo.

Sakay sang motorsiklo ang mag-asawa nga Leonardo Tagamolila kag Rhea Mae Tagamolila, residente sang Barangay San Jose, Tubungan.

Nakaagum sang head injury ang mag-asawa nga may suksok nga helmet pero nagtabog tungod sa impact. Wala naman napilasan ang driver sang salakyan.

Nagdiretso pa ang salakyan sa gate sang balay sa kilid sang karsada suno sa police.

Detained sa police station ang driver sang salakyan.