2 patay sang na-aksidente ang motorsiklo sa Sigangao Bridge sa Zarraga

ILOILO — Gindeklarar nga dead-on-arrival sa ospital ang mag-abyan sang na-aksidente ang motorsiklo sa taytay sa Barangay Sigangao, Zarraga mga las-9:36 kagab-i.

Suno kay Police Captain Dandy Ilalto, hepe sang Zarraga Municipal Police Station, naga-ulan sang natabu ang aksidente kag madasig ang pagpadalagan sang motorsiklo nga ginadala ni Lorman Almarel gani nadanlog kag nag-umpok sa tinabuan sang aspalto.

Nagtabog kag nahulog sa suba ang backrider nga si Kennery Fernandez samtang nagdasok sa gutter sang taytay si Almarel.

Wala sang suksok nga helmet ang duha sang natabu ang aksidente.

Ginpabutyag man ni Ilalto nga nag-overtake pa sa patrol car sang police ang duha antes natabu ang aksidente.

Gilayon naman nga nakaresponder ang police kag nadala sa ospital ang duha pero wala na matabangan. — via Aksyon Maria Kayla Tingzon