Lalaki patay sang gintiro sang barangay tanod sa Ajuy

ILOILO–Patay ang 50-anyos nga lalaki sang gintiro sang barangay tanod sa Sitio Bobog, Brgy. Silagon, Ajuy mga las-5:20 kahapon sang hapon, Nobyembre 7.

Naka-agum sang pilas sa ilong ang biktima nga si alyas Dodoy tuga sang pagpangtiro, samtang nakapalagyo ang suspect nga si alyas Emboy.

Nagaguwa sa pag-imbestigar sang pulis nga ginsugod sang biktima ang suspect sa isa ka beach resort kun diin siya naga-obra bilang caretaker kag may pagsabtanay sa tunga nila. Hubog ang biktima sang nagpadulong sa resort.

Suno kay PCapt. Jose Winston Biadog, OIC sang Ajuy Municipal Police Station, sang adlaw antes natabo ang pagpangtiro, may pagba-isay sa tunga sang suspect kag sang biktima tungod sa pagsita sang suspect sa sala nga pag-parking sang biktima sa higad sang dalan.

Ini ang ginalantaw nga anggulo sang Ajuy Police sa pagsulong sang biktima sa suspect nga ginhalinan sang ila pagsabtanay tubtob nga nakapalupok sang pusil ang suspect.

Nakapalupok man ang suspect sa utod sang biktima nga tuyo man lang kuntani magsaway sa iya utod pero wala naigo.

Pagkatapos sang insidente, nakapalagyo ang suspect dala ang iya gingamit nga pusil.

Ipaidalum sa autopsy ang bangkay sang biktima agud mahibaluan kun ano nga kalibre sang pusil ang gingamit sa pagpatay.

Nagapabilin nga at-large ang suspect. — via Aksyon Marvin Malificiar