Aspirants sa pagka-konsehal sa siyudad sang Iloilo para sa 2025 midterm elections nangin 29 na lang suno sa Comelec
29 na lang ang mga aspirants sa pagka-konsehal sa Iloilo City para sa 2025 midterm elections.
Ini tungod nag-withdraw, pila ka adlaw pagkatapos sang filing sang certificate of candidacy, ang independent nga si Wincy Elen sang iya kandidatura. Pero base sa tentative list sang mga aspirants nga na-post sa website sang Comelec, nalakip gihapon ang ngalan ni Elen.
Una na nga ginpahayag sang Comelec nga gina-finalize pa nila ang listahan sang mga nagapadalagan antes ma-imprinta sa official ballot nga gamiton sa eleksyon.
Sa nasambit nga tentative list, 37 ang mga aspirants sa Iloilo City nga ginalakipan sang tatlo sa pagka-kongresista, duha sa pagka-mayor, kag duha man sa pagka-vice mayor.
Ginpaathag naman ni Mr. Jonathan Sayno, election assistant II sang Iloilo City Comelec nga puwede pa maka-withdraw ang mga kandidato tubtob sa udto sang election day pero wala na sang substitution nga matabo.
