ILOILO — Arestado ang 10 ka mga indibidwal sang nadakpan nga nagapa-upas damang sa Brgy. Namocon, Tigbauan pasado las-4:10 sang hapon kahapon. Nobyembre 17.
Suno kay Police Captain Alfred Mansoy, officer-in-charge sang Tigbauan Municipal Police Station, nakabaton sila sang impormasyon kagab-i nga may “big event” nga hiwaton sa nasambit nga lugar.
Gin-verify sang police ang impormasyon kag natukiban nga may paupas sang damang sa lugar.
Na-recover ang lima ka magagmay nga plastic box nga may unod nga mga damang, apat ka motorsiklo kag P1,600 nga bet money.
Ginpahayag ni Mansoy nga lunsay taga-Tigbauan ang mga nadakpan samtang nakapalagyo ang mga iban pa nga involved.
Detained sa Tigbauan Police Station ang mga nadakpan kag pasakaan sang kaso nga paglapas sa Presidential Decree No. 1602 ukon ang Anti-Illegal Gambling Act. — via Aksyon Paula Elambayo
