48 ka balay, mosque nasunog sa San Pedro, Molo
ILOILO CITY — 57 ka mga pamilya ang nadulaan sang balay tungod sa daku nga sunog sa Brgy. San Pedro, Molo kahapon sang hapon, Nobyembre 21.
Base sa record sang Iloilo City Social Welfare and Development Office, 48 ka mga balay ang nasunog sa diin 46 ang natupok gid, samtang duha ang partially damaged. Nasunog man ang mosque nga nahamtang sa lugar.
Kalabanan mga human sa light materials kag naga-ikit-ikit ang mga pamalay rason nga madasig naglapta ang kalayo.
Naglawig sang masobra duha ka oras ang pagpakig-away sang mga bombero sa kalayo tungod mamadlos ang hangin kag gutok ang lugar gani indi makasulod ang mga fire trucks sa natabuan sang sunog.
Temporaryo nga nagatiner sa Molo 1 Elementary School ang mga magpamilya nga nasunugan.
Sa interview sang Aksyon Radyo Iloilo, ginpahayag ni San Pedro, Molo Punong Barangay Karl Lapascua, lima ka mga classrooms sang eskwelahan ang gin-okupar sang mga apektado nga pamilya.
Nagpanawagan si Lapascua nga mabuligan ang iya mga residente nga nagakinahanglan sang pagkaon, mainom nga tubig, kag mga panapton.
Gina-usisa pa sang Bureau of Fire Protection- Iloilo City ang ginhalinan sang kalayo nga nagresulta sang daku nga sunog.
Base sa initial nga imbestigasyon sang BFP- Iloilo City, ginpahayag ni Fire Officer 2 Earl Anthony Darroca, naglab-ut sa 3.6 million pesos ang kahalitan sang sunog.
Natumod na sang BFP- Iloilo City ang ginhalinan sang kalayo antes naglaton sa mga pamalay nga lunsay human sa light materials pero nagpamalibad si Darroca nga ibuyagyag samtang nagapadayon ang imbestigasyon.
May posibilidad suno kay Darroca nga electrical in nature ang ginhalinan sang kalayo pero gina-imbestigaran pa nila.
