Dalagita nagreklamo nga gin-rape sang 3 ka lalaki lakip ang 2 ka menor-de-edad sa Santa Barbara

ILOILO — Nagreklamo ang 15-anyos nga dalagita nga gin-rape siya sang tatlo ka mga lalaki lakip sang duha ka menor-de-edad kag college student sa Sta. Barbara.

Suno kay Police Major Ciriaco Esquilarga, hepe sang Sta. Barbara Municipal Police Station, base sa panaysayon sang dalagita nga si Nene, natabu ang gina-alegar pagpanghimulos sang Lunes, Nobyembre 25 pasado las-4 sang hapon.

Sa pagpangusisa sang police nga antes ang insidente, nagkitaay si Nene, ang 16-anyos, 17-anyos kag 21-anyos nga lalaki upod ang iban pa gid nila nga mga abyan sa tambayan sa Sta. Barbara agud mag-inum-inom.

Ginpahayag sang police nga naghagaday ang tatlo ka mga lalaki kag si Nene nga magkadto sa masiut nga lugar sa diin natabu ang gin-alegar nga pagpang-rape, suno sa police. Pareho nga naka-inum ang tatlo sang nagpadulong sa lugar.

Pagkatapos sang natabo, nagpauli si Nene kag nagpanugid sa iya abyan nga amo ang nagpangayo sang bulig sa mga barangay officials kag nagpahibalo sa police.

Pasado las-otso na sa gab-i sang nakaresponder ang police sa lugar kag nakuhaan sang pahayag ang tagreklamo.

Nagtu-ad man si Nene sang natabu sa iya kag gilayon nga natultulan sang police ang ginateniran sang duha ka menor-de-edad kag na-rescue kahapon, Nobyembre 26.

Nag-surrender sa Lemery police ang 21 anyos nga lalaki kahapon kag ginkuha sang Sta. Barbara police sa Lemery.

Napasakaan na sang kaso nga paglapas sa Republic Act 7610 ukon ang Special Protection of Children Against Abuse, Exploitation and Discrimination Act ang 21-anyos nga lalaki subong nga gab-i.

Ginatinguhaan sang Aksyon Radyo Iloilo News team sang pahayag ang mga ginareklamo. — via Aksyon Paula Elambayo