Helmet nga ginasuksok ang pulis nga assign sa PRO 6 nahulugan sang natipi nga semento halin sa ginakay-o nga Ungka Flyover

ILOILO CITY — Nahulugan sang natipi nga semento halin sa ginakay-o nga Ungka Flyover sa Pavia ang Police nga na-assign sa Police Regional Office 6 sa Camp Delgado samtang nagalabay sa idalom sang flyover.

Suno kay Police Staff Sergeant Frank Sanchez, natabo ang insidente pasado las-6:30 kagab-i samtang papuli siya halin sa kampo.

Nakibot na lang siya sang may naglagapok sa helmet nga iya ginasuksok.

Gilayon nga ginsakaan ni Sanchez ang mga nagatrabaho sa flyover kag ginpamangkot apang wala siya ginsapak.

Tungod sini, nagdesisyon ang police nga magpa-blotter sa Pavia Municipal Police Station agud ma-aksyonan sang DPWH 6 kag contractor.

Ini na ang ikatatlo ka beses nga na-record sang Aksyon Radyo Iloilo nga may nahulugan sang debris sa flyover.

Sa subong, ginatinguhaan sang Aksyon Radyo Iloilo News team nga makuhaan sang pahayag ang IBC nga contractor sang flyover kag DPWH 6. — via Aksyon Cedrick Anona