3 ka classrooms sang Salapantan National High School sa San Miguel nasunog

ILOILO — Isa ka classroom ang totally damaged samtang partially damaged ang duha sa Leonora Salapantan National High School sa San Miguel sang nasunog las-8:30 kagab-i, Disyembre 7.

Suno kay FO2 Elmo Santio, imbestigador sang San Miguel Municipal Fire Station, nagaguwa sa initial nga imbestigasyon nga electrical in nature ang ginhalinan sang kalayo.

Dugang niya, nakabati ang guwardiya nga may kuryente nga nagasirit antes mag-ibwal ang kalayo.

Maswerte nga wala na naglapta pa ang kalayo kag lunsay sa ground floor ang mga classroom nga nadalahig.

Naglab-ot sa ginabanta P60,000 ang balor sang kahalitan sang sunog.

Gindeklarar nga fire out las-9:32 sang gab-i. — via Aksyon Maria Kayla Tingzon