2 nalipong, 10 napilasan kag naglain ang pamatyag sa opening of lights sa Iloilo Provincial Capitol — PDRRMO

Gin-report sang Iloilo Provincial Disaster Risk Reduction and Management Office (PDRRMO) nga duha ang nalipong kag 10 ang napilasan kag naglain ang pamatyag sa opening of lights sa provincial capitol grounds kag sa guwa sang kapitolyo sang Biyernes sang gab-i, Disyembre 13.

Sa amo nga report, tag-isa ang naglingin ang ulo; nagpalanglapsi; nabudlayan mag-ginhawa; nabuklan; nagpalangluya; kag napilasan sa mata kag tuhod.

Samtang may na-record naman ang PDRRMO sang pasyente nga nag-seizure kag gilayon nga gindala sa St. Paul’s Hospital.

Las-5 sang hapon sang gin-activate ni PDRRMO head Retired Colonel Cornelio Salinas ang blue alert status tungod sa kadamuon sang tawo sa kahiwatan.

Ginabanta sang PDRRMO nga nagdangat sa 3,000 ka mga individuals ang nag-witness sa opening of lights sang provincial government.

Nahibaluan nga napuno ang Bonifacio drive tungod ginsiraduhan ang gate sang kapitolyo samtang nagahiwat pa sang programa. — Aksyon Cedrick Anona