Driver sang motorsiklo patay sang nakabunggo sa taxi sa Tigbauan

ILOILO— Patay ang driver sang motorsiklo sang nakabunggo sa taxi sa Brgy. Baguingin, Tigbauan las-7:35 kagab-i.

Suno kay Police Captain Alfred Mansoy, OIC sang Tigbauan Municipal Police Station, halin sa Antique ang taxi kag pabalik na sa syudad samtang papuli na sa Igbaras ang driver sang motorsiklo antes ang insidente.

Sa imbestigasyon sang police, pag-abot sa Brgy Baguingin, naglapaw ang motorsiklo sa iya nga linya gani nakabunggo sa taxi.

Madanlog ang dalan kagab-i, suno sa police tungod naga-ulan.

Ginhangagaw pa dala sa ospital ang 40-anyos nga driver sang motorsiklo pero gindeklarar nga dead-on-arrival tungod sang pilas sa ulo kag dughan.

Gin-detain naman sa Tigbauan Municipal Police Station ang driver sang taxi. — Aksyon Farrah Mae Morano