ILOILO — Pilas sa tudlo sa tuo nga kamot ang naagum sang 58-anyos nga lalaki sang ginhandos sang garaw (ginagamit sa pagpanghagbas) sang iya bayaw sa Brgy. Daga, Sta. Barbara pasado las-12:10 kahapon sang kaagahon, Disyembre 26.
Suno kay Police Corporal Ayrhan June Jancilan, imbestigador sang Sta. Barbara Municipal Police Station, hubog ang 35-anyos nga suspek sang nagsulod sa gate sang balay sang biktima bitbit ang garaw.
Pagsulod sa gate, ginpanghandos sang suspek ang tyangge.
Nagguwa ang biktima kag ginkompronta ang suspek tubtob nga nagpukutay sila kag napilasan sang ginhandos sang garaw.
Samtang nagapukutay, nakakuha sang tubo ang biktima kag nagbalos sa suspek. Ang bata sang biktima, nagkuha naman sang botelya sang ilimnon kag ginlampusan sa ulo ang suspek.
Ginbuno man sang bata ang suspek suno sa police.
Nagpalagyo ang bata samtang gindala sa ospital ang biktima kag ang suspek nga lunsay may mga pilas.
Sa pagpangusisa sang police, may daan nga hiligut-anon ang magbayaw tungod sa away sa duta.
Wala pa sang desisyon ang pamilya kun mapasaka sang kaso sa suspek suno sa police. — Aksyon Paula Elambayo
