Lalaki nasapwan patay sa irigasyon sa San Miguel

ILOILO — Patay na sang nasapwan 45-anyos nga lalaki sa irigasyon malapit sa ila balay sa Brgy. Sto. Nino, San Miguel pasado las-8 sang aga sang Disyembre 29.

Suno kay Police Senior Master Sergeant Billy Salvilla, imbestigador sang San Miguel Municipal Police Station, nag-inom si alyas Itik sang Brgy. San Jose, San Miguel upod ang iya abyan sa ila balay sang gab-i sang Disyembre 28 kag sang natapos sila inom mga pasado las-9, nagpauli na ang iya abyan pero nag-abtanay pa sila sa tyangge kag nag-inom liwat.

Sang pauli na ang duha, nagpangayo pa sang inugbakal sang sigarilyo si Itik kag naglisensya nga mabalik sa tyangge rason nga nagdiretso na pauli ang iya abyan suno sa pulis.

Base sa imbestigasyon, sang pabalik na si Itik sa tiyangge, natumba siya samtang nagatabok sa sementado nga baral sang irigasyon nga nagaserbe nga latayan nga ginabanta isa ka tapak ang kalaparon kag duha ka metros ang kalabaon.

Nalampos ang sag-ang sang lalaki rason nga nalipong pagtupa sa irigasyon kag nalumos sa ginabanta duha ka tapak nga kadalumon sang tubig suno sa pulis. –– ARI Trainee Reporter Ivan John Villa