Masobra P4 million nga balor sang suspected shabu na-recover sa 3 ka subjects sang drug buy bust sa Balabago, Jaro; Isa sa mga subjects pilason sang ginpahayag nagbato sa pulis
ILOILO CITY — Nakuhaan sang P4,080,000 nga balor sang suspected shabu ang mga subjects sa drug buy bust operation sa Barangay Balabago, Jaro las-5:15 sang hapon sang Enero 16.
Ginkilala ang subjects kanday John Winston Porras, 29-anyos, residente sang amo nga barangay; Jesus Angelo Martinez, 34-anyos nga taga-Housing, Mandurriao; kag Berna Villarosa, 25-anyos sang Bolilao, Mandurriao.
Anum ka sachets kag pulo ka dalagko nga pinutos sang suspected shabu nga ginabanta nagabug-at sang 600 grams ang na-recover operasyon.
Ginapahayag sang otoridad nga ang amo nga mga suspected shabu ang ginpanghaboy sang mga subject, lakip na ang caliber 45 nga pusil kag magazine nga may isa ka bala.
Nagresulta sa pagtiniruhay ang gin-conduct nga drug buy bust operation sang ginpahayag una nga nagpalupok ang mga subject.
Suno kay PCOL Kim Legada, director sang Iloilo City Police Office (ICPO), nahuman ang transaksyon samtang yara sa sulod sang salakyan ang mga suspetsado.
Sang nagdeklarar na nga buy bust ang police poseur buyer nga yara sa guwa sang salakyan, naggabot sang pusil ang isa sa mga subjects kag gintiro ang pulis pero wala naigu tungod madasig nga nakahapa. — Aksyon Maria Kayla Tingzon
