Pulis nga ginreklamo nagmaoy sa balay ilimnan sa Estancia magapangatubang sang administrative sanction

ILOILO — Magapangatubang sang administrative sanction ang pulis nga ginreklamo nagmaoy sa balay ilimnan sa Barangay Poblacion, Estancia sang Enero 28 sang gab-i.

Magluwas pa ini sa kaso criminal nga iga-file batok kay Derick Zamora, 27-anyos nga assigned sa PNP Maritime Group, Estancia Maritime Station.

Ginpreso sa Estancia Municipal Police Station si Zamora kag ginpasakaan sang kaso nga alarm and scandal pero nakapiyansa.

Suno kay Police Major Marvin Buenavista, hepe sang Estancia Municipal Police Station, nag-inom-inom si Zamora upod sa iya mga abyan tungod may birthday pero nahubog rason nga nagmaoy. 

Nagpangayo sang bulig ang mga abyan ni Zamora sa iya mga kaupdanan nga police agud mapa-untat siya pero nasumbagan pa niya ang mga nagresponder nga kanday Patrolman John Lourenz Corvera kag Patrolman Gil Siegfried Fabella, Jr. — Aksyon Maria Kayla Tingzon