Sanitary landfill sa Calajunan, Mandurriao pasiraduhan sa 2026; Integrated Waste Management Facility buksan sa Ingore, La Paz

ILOILO CITY — Pasiraduhan ang sanitary landfill sang siyudad sa Brgy. Calajunan, Mandurriao sa 2026 tungod malab-ot na ang 10 ka tuig nga lifespan, base sa guidelines sang Department of Environment and Natural Resources (DENR).

“Ang useful life sang aton nga sanitary landfill is 10 years and that will be in 2026 amo na ang ika-10th year niya. Because of that, dapat nga i-update ang aton nga 10-year Solid Waste Management Plan because ara na kita sa transition stage sang landfill pakadto na sa other facility,” paathag ni Engr. Neil Ravena, head sang General Services Office.

Sa tiun nga magsirado ang sanitary landfill sa Mandurriao, mabukas ang Integrated Solid Waste Management Facility sang siyudad sa Brgy. Ingore, La Paz.

Ini ang rason nga ginduso ang pag-update sang 10-Year Solid Waste Management Plan nga gin-aprubahan sang Iloilo City Council. Ginpaathag niya nga importante ang updated plan agud makakuha sang permit para sa pagpatindog sang Integrated Solid Waste Management Facility sa La Paz.

Nagalab-ut sa 400 tonelada nga basura ang matipon sang siyudad kada adlaw nga gina-ula sa sanitary landfill sa Mandurriao.