Gubernatorial candidate sa Guimaras nadakpan sa entrapment operation tungod sa kaso nga swindling
ILOILO CITY – Nakaguwa na sa presuhan sang Sibunag Municipal Police Station si Guimaras Gubernatorial Candidate Margarita Cacho kag iya sekretarya sang nakapiyansa kagab-i, Pebrero 12.
Ini ang ginkumpirmar ni Police Captain Ross Kevin Odejas, hepe sang Sibunag Municipal Police Station.
Si Cacho ang gindakop sang Regional Special Operations Group 6, Criminal Investigation Detection Group (CIDG) kag Guimaras Police Provincial Office upod ang iban pa sa kaso nga swindling sang Pebrero 11.
Suno kay Police Regional Office (PRO) 6 Director Brigadier General Jack Wanky, nag-ugat ang reklamo batok kay Cacho sang nag-file ang isa ka complainant sa Guimaras Provincial Prosecutor’s Office tungod ginpasalig niya sa proyekto para sa Private Motor Vehicle Inspection Center, emission testing center para sa Department of Transportation (DOTr) sa baylo sang P1 million.
Septiyembre 2024 sang ginpahayag sang complainant nga nagbayad siya sang P400,000 kay Cacho, kag pagkatapos sini nag-demand ang ginareklamo sang full payment.
Tungod sa amo nga reklamo, naghimo sang entrapment operation ang otoridad sa diin nadakpan si Cacho kag iya sekretarya nga si Cayetano Leal, 48, residente sang Barangay Misi, Lambunao sa kaso nga swindling.
Nagapabilin naman sa presuhan ang duha ka personnel sang Philippine Coast Guard-Masbate nga kanday Apprentice Seaman Marwin Parpan, 31, residente sang Dipolog City kag Seaman Second Class Rico Maylan, 27, residente sang Siaton, Negros Oriental nga nagpakilala nga “body guards” ni Cacho.
Ang duha nagapangatubang sang kaso nga paglapas sa Comprehensive Firearms and Ammunition Regulation Act (RA 10591) in relation sa COMELEC Resolution number 11067 (COMELEC Gun Ban). — Aksyon Farrah Mae Morano
