Pick up naglapaw sa kanal sa Guimbal; 7 ka tuig nga bata diyutayan lang mabungguan

ILOILO — Nag-malfunction ang preno sang pick-up nga ginamaneho sang 25-anyos nga babaye rason nga naglapaw sa kanal sa Brgy. Particion, Guimbal sang Pebrero 22.

Suno kay Police Corporal Tommy Macalalag, imbestigador sang Guimbal Municipal Police Station, halin sa Igbaras kag pakadto sa Guimbal ang direksyon sang pick-up sang natabo ang aksidente.

Nagapaliko sa kurbadahon nga porsyon sang dalan ang driver sang nadulaan sang kontrol sa manibela rason nga nagdiretso sa kanal ang salakyan.

Nakuhaan sang CCTV camera ang natabo nga aksidente sa diin diyutayan lang nga mabungguan ang bata nga lalaki nga nagalakat sa higad sang dalan.

Nakahingagaw nga makalumpat ang bata sa kanal rason nga wala siya madalasa sang salakyan. Napilasan ang bata sa ulo kag gin-operahan na sa ospital.

Wala pa sang desisyon ang pamilya sang bata kun mapasaka sang kaso sa driver. — Aksyon Paula Elambayo