Bangkay sang lalaki nasapwan sa katubuhan sa San Enrique
ILOILO — Nakilala na ang lalaki nga nasapwan sa Brgy. Paga, San Enrique nga may mga pilas sang pagkabuno kahapon sang aga, Pebrero 23.
Suno kay Lt. Cristy Val Dalde, officer-in-charge sang San Enrique Police Station, nagpdulong sa ila ang asawa sang lalaki kag positibo siya nga gin-identify.
Ginkilala ang biktima kay Carlos Alcarde, habal habal driver nga taga-Rizal Jalandoni Extension, Calinog.
Sa pagpangusisa sang police sa asawa, las-8 kahapon sang aga, naglisensya nga mamiesta sa Brgy. Cabagiao, Calinog Alcarde ang iya bana kag wala na nakapauli.
Kaina sang aga nahibaluan sang asawa paagi sa balita nga nasapwan ang iya bana sa katubuhan.
May kaso sa pagpangawat si Alcarde nga natabo sa Calinog sang 2022 kag nakapiyansa siya suno sa asawa.
Dugang pa sang San Enrique police, nakasugid ang asawa ni Alcarde nga nagapamulang ang iya bana.
Ini ang isa sa mga ginalantaw nga motibo sang police sa pagpatay sa biktima.
Ipaidalum pa sa autopsy ang bangkay sang lalaki nga may pilas sa tiyan, tuo nga kilid, kag likod. — Aksyon Paula Elambayo
