Operator sang sound system nasapwan nga patay kag may pilas sang pagkatiro sa ulo sa Bingawan

ILOILO — Patay na sang nasapwan ang 34-anyos nga lalaki sa sulod sang elf truck sa Brgy. Agbao, Bingawan pasado kahapon sang aga, Marso 9.

Ginkilala ang lalaki kay alyas Omeng, taga-Lambunao kag operator sang sound system.

Suno kay PLt. Philip Girao, officer-in-charge sang Bingawan Municipal Police Station, pukawon kuntani sang iya upod ang lalaki sang nasapwan nga nagahilay sa driver’s seat sang truck kag may pilas sang pagkatiro sa ulo.

Sa pagpangusisa sang police, kahapon nag-set-up sang sound system ang biktima tungod may event sa barangay nga kabahin sang ila fiesta.

Nag-responder ang police sa lugar kag nagtawag sang taga-Scene of the Crime Operatives (SOCO).

Pag-abot sang SOCO, may na-recover nga isa ka empty shell kag slug sang wala pa mahibaluan nga kalibre sang pusil.

Nagtukod na sang Special Investigation Team ang Bingawan police agud mapadalman ang imbestigasyon sa natabo. — Aksyon Paula Elambayo