ILOILO CITY — Ginpamatbatan nga “guilty beyond reasonable doubt” ang broadcaster nga si Jun Capulot sa kaso nga cyber libel.
Complainant sa kaso si Mr. Shariko Salcedo, kilala nga contractor sang pila ka mga proyekto sang Guimaras Provincial Government, kag may pila man ka proyekto sa Iloilo.
Suno kay Atty. Aida Rose Villanueva, abogado sang complainant, nag-ugat ang pagpasaka sang kaso ni Salcedo kay Capulot halin sa tatlo ka episode sang pagpakalain niya sa kontraktor gamit ang nagkalain-lain nga news platform sang RMN Iloilo sa diin sadto nagatrabaho ang broadcaster.
“MALISYOSO” NGA PAGPABATI-BATI SA CONTRACTOR SA GUIMARAS
Sa mga episode, ginpabutyag ni Atty. Villanueva nga may ginpabati-bati-an si Capulot nga kontraktor sa Guimaras nga gintawag niya “kurakot,” “nagapang-bribe sa mga proyekto sang gobyerno,” kag “nagasuyop sang kuwarta sang gobyerno.”
Ang tatlo ka insidente natabo sang Septiyembre 5 kag 25, 2020, kag October 8, 2020. Sang 2021 naman ginpasaka ang kaso.
Ang mas mabug-at pa gid diri, suno kay Atty. Villanueva, nga gintawag niya ang amo nga kontraktor nga “adik.”
Sa pila ka mga programa ni Capulot ginhinambit man niya ang pila ka mga hints kapareho sang “ang kontraktor nga ini friend ni sila ni [former] Cong. [JC] Rahman Nava,” dugang pa sang abogado.
May ara man sang isa ka episode kun diin ang ginhatag ni Capulot nga hint amo nga “Jen” ang ngalan sang asawa sang kontraktor nga iya ginatumod. “Jenny” naman ang ngalan sang asawa ni Salcedo, suno sa iya abogado.
Nagagamit man sang ngalan nga “Shaq” si Capulot sa mga programa niya. Nahibaluan nga “Shaq” ang hayo ni Salcedo, dugang pa ni Atty. Villanueva.
Suno sa abogada, indi magkilalahay si Salcedo kag Capulot rason nga natingala sila kon ano ang gin-umpisahan sang pagpabati-bati ni Capulot kay Salcedo gamit ang iya nga mga programa.
Suno kay Atty. Villanueva, kun tipunon ang tanan nga mga hints nga ini nga ginpanglawag ni Capulot, nagatumod sa complainant nga si Shariko Salcedo.
Indi matumod ni Salcedo, suno kay Atty. Villanueva, kon diin naghalin ini tanan nga pagpakalain sa iya ni Capulot, kag tungod nagakaguba na ang iya nga reputasyon, nagdesisyon siya nga magpasaka sang kaso sa iya.
Ini tanan nagserbe nga mga ebidensya sa pagpasaka sang kaso kay Capulot nga ginkuha sa Facebook livestream sang nasambit nga estasyunan, kag nabatian man mismo sa Youtube Channel ni Capulot.
Kaina sang aga ginpapanaug sang korte ang desisyon nga nagapataw sang six months to one year minimum nga pagkapreso tubtob two years and four months maximum nga pagkapreso kay Capulot.
May mga danyos man siya nga dapat bayran nga P150,000 para sa moral damages, P100,000 para sa exemplary damages, kag P50,000 nga attorney’s fee. —Aksyon Marvin Malificiar
