AKLAN— Napasakaan na sang kaso ang tatlo ka mga lalaki nga nagpuli sumbag sa bata ni Senator Jinggoy Estrada kag hinablos sa Boracay Island sa Malay.
Suno kay Police Lieutenant Colonel Mar Ravelo, hepe sang Malay Police Station, kaso nga physical injury ang ginpasaka sa tatlo ka 18-anyos nga lalaki. Duha ang taga-Barangay Manoc-Manoc kag taga-Barangay Balabag, Boracay Island ang isa.
Base sa imbestigasyon, antes ang insidente nga nagluntad kahapon sang kaagahon, nakita sa CCTV camera footage nga nagkitaay ang mga biktima kag mga suspek sa bar pero wala man nagginamo.
Mga las-2 sa kaagahon, samtang nagalakat kanday Julian Ejercito, 29, kag iya pakaisa nga si Jefferelly Vitug, 24, sa beach front sa Station 2, ginsundan sila sang tatlo ka mga lalaki kag ginpangsumbag.
May nakakita sang insidente gani nagpangayo sang bulig sa police kag madasig nga nagpalagyo ang mga suspek, suno sa police.
Gindala sa Ciriaco S. Tirol Hospital ang duha ka biktima para mabulong.
Sa follow up operation, nakilala sang police ang mga suspek gani nadakpan.
Gin-ako sang mga suspek nga gin-trippingan nila ang mga biktima. — Aksyon Farrah Mae Morano
