ILOILO — Napasakaan na sang kaso nga attempted rape ang rider nga ginreklamo nagtuyo maghimulos ang iya 19-anyos nga babaye nga pasahero sa Pulo Maestra Vita, Oton sang Mayo 18.
Suno kay Police Master Sergeant Ma. Elena Doliguez, imbestigador sang Oton Municipal Police Station, sigurado sila nga ang napasakaan sang kaso amo ang rider nga gin-hire sang tagreklamo. Ini tungod pareho nga na-identify sang lalaki nga nagbulig kay alyas Marie ang hitsura sang suspect.
Dugang sang police, nadugayan ang pagpasaka sang kaso tungod Biyernes na sang nagligad nga semana nagguwa ang opisyal nga dokumento halin sa Land Transportation Office bisan pa may identity na sila sang rider.
Lakip sa mga ebidensiya nga ginpasa sa piskalya agud mapasaka ang kaso amo ang mga affidavit sang tagreklamo, witness, medical certificate sang tagreklamo kag ang gin-verify nga rehistro sang motorsiklo sa LTO.
Sa pinakaulihi nga impormasyon nga nakuha sang police sa barangay, nagsaylo na sa iban nga banwa ang ginareklamo nga rider pero wala sila nakahibalo kon sa diin kag kon sin-o ang iya ginkadtuan. — Aksyon Maria Kayla Tingzon
