ILOILO CITY—Masobra 600 ka seedlings sang native kag flowering trees lakip na ang ornamental plants ang gintanum sa pila ka strategic locations sa siyudad sang Iloilo sa ginhimo nga Tree Planting Activity nga kabahin sang World Environment Day subong nga adlaw.
Ginatos ka mga volunteers ang nagpasakop sa aktibidad nga ginhiwat sa Diversion Road, Iloilo Sunset Boulevard, Jaro Plaza kag Plaza Libertad.
Sa mga plazas, tag-20 ka native trees ang gintanum kapareho sang Molave, Narra, kag Banaba.
Sa Iloilo Sunset Boulevard, masobra 300 ang nag-upod sa pagtanum sang 200 ka native trees kag 500 ka bougainvillea kag yellow bells nga mga flowering plants.
Sa Diversion Road, kombinasyon sang 300 ka mga native trees kag shady kag flowering plants ang gintanum sang masobra 200 ka mga volunteers.
Ang mga volunteers halin sa nagkalain-lain nga ahensya sang gobyerno, mga estudyante kag ila eskwelahan, barangay officials, business sector, kag mga opisyal sang siyudad.
Una na ginpabutyag ni Engr. Neil Ravena, head sang General Services Office, nga kabahin lang ini sang Project Transform sang siyudad nga gintukod agud makahimo sang mga pamaagi kon paano mahagan-hagan ang epekto sang climate change sa siyudad.
Dugang pa ni Engr. Ravena, si Mayor Jerry Treñas mismo ang nag-ayo nga Diversion Road kag Iloilo Sunset Boulevard ang unahon nga pangtamnan tungod diri nga mga lugar na-record ang pinakamataas nga heat index sang tinalikdan nga mga binulan.
Dugang pa ni Ms. Janis Sy nga head sang City Environment and Natural Resources Office, kick-off pa lang ini sang tree planting activity sang siyudad nga himuon nga series sa masunod nga mga inadlaw. — Aksyon Marvin Malificiar
