Nagsaka sa anum ang laboratory confirmed cases sang MPox sa siyudad sang Iloilo as of June 9.
Ini ang ginkumpirmar ni Dr. Mary Ann Diaz, City Health Officer, sa press conference sang City Health Office (CHO) subong nga aga.
Ang duha ka nagdugang nga kaso ang halin man sa duha ka suspect cases base sa Hunyo 2 nga report sang CHO.
Sa labing una nga kahigayunan, ginbuyagyag sang CHO nga sa anum ka kaso lima ang lalaki kag isa ang babaye nga may MPox.
Magluwas sini, may anum pa ka bag-o nga suspect cases nga ginpaidalum na sa laboratory confirmatory test.
Naka-isolate ang mga MPox patients kag ginabulong samtang yara sa estable nga kondisyon.
Naka-recover naman ang labing una nga kaso sang MPox sa siyudad nga na-record sang Mayo. — Aksyon Marvin Malificiar
