ILOILO — Pilason ang duha ka mga lalaki sang nagbun-anay sa atubang sang tiyangge sa Barangay Tungay, Sta. Barbara kagab-i, Hunyo 13.

Ginkilala ang biktima kay Jerson Panghari, 30-anyos, residente sang amo nga barangay samtang suspect si Alfredo Rupico, 53-anyos nga taga-Guimaras.

Suno kay Inday, hinablos sang biktima, sakay siya sa iya motorsiklo kag nagasunod sa iya tiyo nga naga-motor man sang nabatian nga may hubog nga nagasinggit sang “inaway” sa unhan.

Mabakal lang kuntani sang sigarilyo kag whiskey nga lapad ang iya tiyo sa tiyangge.

Ginpabutyag ni Inday nga isa na ka lapad ang na-inom sang iya tiyo.

Tungod napatay ang iya motorsiklo, naulihi si Inday kag nakita na lang nga ginhandusan sa abaga ang iya tiyo kag ginbuno sa kilid.

Naagaw naman sang iya tiyo ang kutsilyo kag ginbuno sa likod si Rupico.

Nagdalagan pabalik sa ila balay si Panghari kag sang nakita ni Inday nga duguon ang iya tiyo, nagpauli man siya sa ila agud makapangayo sang bulig.

Wala na nakalab-ot sa sulod sang ila balay si Panghari nga natumba kag nalipong.

Gindala sa Western Visayas Sanitarium and General Hospital si Panghari samtang sa Western Visayas Medical Center naman si Rupico. — Aksyon Maria Kayla Tingzon