ILOILO — Patay na sang nakit-an ang 16-anyos nga solterito sang nalumos sa sapa sa Barangay Dongsol Ilaya, Pototan mga las-11:30 kahapon sang aga.
Suno kay Mr. Felipe Galino, commander sang Philippine Tigers Rescue group nga nagbulig sa pagpangita sa bata, las-12:02 subong nga hapon nakita ang bata mga 800 metros ang distansiya halin sa porsyon sa diin siya nalumos.
Sa pagpangusisa sang mga rescuers, luyag kuntani kuhaon sang solterito ang bola nga nagalutaw sa sapa sang nagsarurot siya tungod madalom ang tubig.
May nakita nga duha ka bola mga 200-300 metros ang distansiya sa diin nasapwan ang bata.
Dugang ni Galino, una na nga may nakakita sa solterito nga nagapungko sa pangpang malapit sa barangay road. Antes sini nagahampang pa siya upod sa mga bata sa waiting shed.
May naglabay naman nga nagalibod sang isda nga nakakita sang kamot sang tawo nga nagabayaw nga daw kaangay nga nagakalumos sa pihak na nga porsyon sang pangpang gani nagtawag sa kapitan.
Yara na sa lugar ang pamilya sang bata nga suno sa iya pakaisa “late ang pag-develop kumparar sa iya mga ka-edad” kag indi maayo makahambal. — Aksyon Maria Kayla Tingzon
