Tungod sa sunluganay, Grade 10 student pilason sang nabun-an sang Grade 9 sa San Joaquin

ILOILO — Pilason ang 15-anyos nga Grade 10 student sang nabun-an sang 13-anyos nga Grade 9 student sa sulod sang eskwelahan sa San Joaquin kahapon, July 2.

Suno kay Police Captain Chrysler John Ledesma, officer-in-charge sang San Joaquin Municipal Police Station, nagsunluganay ang duha ka solterito tubtob nagluntad ang insidente.

Ginpahayag sang police nga ginsunlog sang 13-anyos ang Grade 10 student tungod sa kadakuon sang iya lawas nga wala naga-angay sa iya edad.

Nasundan ini sang kinagamo tubtob nabun-an ang Grade 10 student nga napilasan sa tuo nga parte sang tiyan.

Gin-operahan sa San Joaquin Mother and Child Hospital ang biktima.

Na-rescue ang 13-anyos nga solterito kag nakuha ang folding knife nga nagalaba sang 5 inches.

Yara sa kustodiya sang Department of Social Welfare and Development Office sa San Joaquin ang 13-anyos nga solterito. — Source: Dan Jamoyot, ARI Trainee