ILOILO CITY — Dakup ang mag-iloy kag pangayaw nga lalaki sa drug buy bust operation sa Zone 2 Barangay Baldoza, La Paz mga las-12:15 kahapon sang kaagahon, Hulyo 11.
Ginkilala ang mga nagkaladakpan sa mag-iloy nga kanday alyas Concep, 65-anyos kag alyas Toto Joshua, 33, kag alyas Justine, 22, nga taga-Arevalo pero nagadayon sa ila.
Nakapalagyo naman ang umagad ni alyas Concep nga si alyas Nonoy, 48-anyos.
Suno kay Police Captain Jeffrey Delgado, officer-in-charge sang Police Station 2 sa La Paz, una na nga nadakpan sa drug bust operation ang live-in partner ni alyas Nonoy nga nakapalagyo sang 2024 kag na-monitor liwat sang kapulisan nga may illegal drug transactions nga liwat nagakatabu sa ila balay.
Base sa surveillance sang kapulisan, may nagakadto sa balay sang mga subjects agud magbakal sang illegal nga druga.
Paagi sini natukiban nga kabahin sang illegal nga transaksyon ang iloy gani nalakip siya sa mga gindakup.
Antes ang pagdaho sang buy bust item, kumpleto pa sila nga apat sa sulod sang balay pero sang nahuman ang transaksyon, nangin-dulaan si alyas Nonoy.
Sa pagpangusisa sang police sa mga subjects, sa Manila nagahalin ang supply sang illegal nga drug nga ila gina-pick up sa nakasugtan nga lugar kag ginabaligya sa ila mga parokyano sa barangay.
Ginpabutyag man ni Delgado nga preso sa New Bilibid Prison sa Muntinlupa ang bana ni alyas Concep pero indi nila maangut sa ila source sang illegal nga druga.
Na-recover sa operasyon ang lima ka sachets sang suspected shabu nga ginabanta nagabug-at sang 40 grams kag may standard drug price nga P272,000. — Aksyon Maria Kayla Tingzon
