ILOILO — Gintinguhaan pa nga i-revive sang crew ang lalaki nga ginpahayag naglumpat sa RoRo vessel nga halin sa Dumangas Port sa Barangay Sapao, sang yara na ini sa tunga sang lawod kahapon, Hulyo 11.
Suno kay Police Master Sergeant Jay Dugayo, imbestigador sang Dumangas Municipal Police Station, na-identify ang lalaki paagi sa ID nga nakuha sa iya wallet.
Ginkilala ang lalaki kay alyas Aming, 57-anyos nga taga-Oton.
Nakuha na sang pamilya ang bangkay kag gindala sa punerarya sa Oton.
Dugang ni Dugayo, wala naman sang plano ang pamilya nga ipa-autopsy ang bangkay tungod nagapati nga pagkalumos ang gintunaan sang iya kamatayon.
Sa pagpangusisa sang police sa pamilya, sadtoanay may nervous breakdown ang ila himata pero madugay na nga nag-ayo.
Makadto kontani si alyas Aming sa iya paryente sa Valladolid, Negros Occidental nga masami niya ginabisita.
Sa report sang Philippine Coast Guard (PCG) nga gin-forward sa police, naka-isa na ka oras ang biyahe sang barko pakadto sa Bacolod City sang naglumpat ang lalaki.
Ginabanta 5 nautical miles ang distansiya sang barko port.
Gindala pa sa ospital sa Dumangas ang lalaki pero gindeklarar nga patay. — Aksyon Maria Kayla Tingzon
