ILOILO — Patay na sang nasapwan ang 40-anyos nga lalaki sa sulod sang manokan sa Sitio Dawis Barangay Buluangan, Guimbal, Iloilo kahapon, Hulyo 11.
Suno kay Police Lieutenant Ronie Saldevia, deputy chief of police sang Guimbal Municipal Police Station, nasapwan na lang sang tag-iya sang manokan nga nagakulob ang lalaki nga residente man sang barangay.
Sa imbestigasyon sang police, masulod kuntani ang lalaki sa amo nga manokan agud lantawon ang mga manok nga ginasagod pagkatapos niya pamubod sa kaiping nga manokan sa diin siya nagatrabaho.
Amay sang tag-iya sang manokan nga gina-obrahan sang lalaki ang nagapanag-iya sa manokan sa diin siya kuntani masulod.
Sa panaysayon sang tag-iya sang manokan suno sa pulis, ginbutangan sang kuryente ang puwertahan bilang proteksyon tungod sa mga ido nga masami nagasulod.
Wala naman nakahibalo ang biktima nga may nabutang nga kuryente sa pwertahan suno sa pulis.
May pilas sa tuo nga paa kag tuhod nga tuga sang pagkakuryente ang lalaki nga amo ang ila ginalantaw rason sang iya pagkapatay.
Yara na sa punerarya ang biktima kag wala na ginpa-autopsy sang iya pamilya. — Aksyon Maria Kayla Tingzon
