3 ka mangingisda na-rescue sang nagkulob ang ginasakyan nga pumpboat sa baybayon sang Carles

ILOILO — Na-rescue na ang tatlo ka mga mangingisda nga sakay sang pumpboat nga nagkulob sa dagat nga sakop sang boundary sang Buenavista Island kag Balbagon Island sa Carles kahapon sang aga, Hulyo 25.

Ginkilala ang mga sakay kanday Manuel Banca nga amo ang boat captain, kag iya crew nga kanday Neil Bullos kag Melvin Parojinog, lunsay taga-Estancia.

Suno kay Ensign Marvince Genzola, spokesperson sang Philippine Coast Guard (PCG) Iloilo, bisan malain ang tiempo nagpasimpalad ang tatlo nga makapangisda.

Pero tungod sa pag-ulan kag dalagku nga balod nagkulob ang sakayan.

Las-11 kaina sang aga sang na-rescue ang tatlo. Gilayon sila nga gindapatan sang first aid antes gindala sa mainland agud mapa-idalum sa physical examination.

Estable na ang tatlo pagkatapos ma-check sang mga personnel sang Carles Municipal Disaster Risk Reduction and Management Office (MDRRMO). — Aksyon Maria Kayla Tingzon