2 ka vintage grenades, mga bala sang rifle nakit-an sa baybayon nga sakop sang Oton

Nakit-an ang duha ka mga vintage nga granada kag mga bala sang rifle sa baybayon nga sakop sang Barangay Trapiche, Oton.

Suno kay Punong Barangay Jorge Mediodia, samtang nagaplastar sang sakayan ang mga pumuluyo nga naga-istar sa likod sang barangay hall nakit-an nila ang mga granada kag bala nga ginaanod sang tubig.

Ginpabutyag ni Mediodia nga anay kampo sang mga Amerikano sang tiempo giyera ang lugar gani ginalantaw niya nga nagkalabilin ang amo nga mga granada kag bala.

Dugang niya nga sa kadugayon, nalubong ang mga ini kag nagtuhaw tungod sa mabaskog nga daludo sang tubig.

Gin-turnover na ang mga granada kag bala sa Explosive Ordnance Disposal sang Iloilo Police Provincial Office (IPPO). — Aksyon Maria Kayla Tingzon