ILOILO — Ginkumpirmar ni Dr. Rodney Labis, chief sang Health Service Delivery Division sang Iloilo Provincial Health Office (PHO) nga napatay ang 58-anyos nga lalaki sa Miagao nga suspected case sang meningococcemia.
Hulyo 30 nakitaan sang sintomas ang lalaki nga ginhilanat kag nagreklamo sang pagpalanakit sang lawas.
Agosto 2 sang nagpakonsulta siya sa Miagao First Aid Clinic kag nakitaan sang mga rashes sa lawas nga isa sa mga palantandaan sang balatian.
Agosto 3 napatay ang pasyente.
Ginpadala pa ang samples sang pasyente sa Research Institute for Tropical Medicine (RITM) para ma-confirm kon meningococcemia gid man ang iya ginkamatay.
Ginpaathag ni Dr. Labis nga ang meningococcemia isa ka bacterial infection nga tama ka malalaton kag makamamatay.
Mahimo ini makalaton paagi sa respiratory droplets kon mahaklo halin sa infected nga tawo nga nanghatsi ukon nag-ubo.
Gina-atake sini ang dugo sang pasyente.
Gina-imbestigaran pa sang mga health authorities kon paano na-infect ang pasyente.
Nahatagan naman sang antibiotics ang mga close contacts ilabi na ang mga health personnel nga nag-handle sa pasyente.
Wala man nag-develop sang sintomas ang mga close contacts, dugang pa ni Labis.
Ini na ang ikaduha nga pasyente sa probinsiya nga napatay nga suspected sa amo nga balatian.
