ILOILO — Naaksidente ang ginasakyan nga angkar-angkar sang biktima sang pagpanglabu samtang nagapakadto sila sa ospital sa Brgy. Rumbang, Pototan kahapon, Agosto 15.
Sakay sa angkar-angkar si Alyas Reymark nga ginlabu sang iya bayaw nga si Alyas Mike sa Brgy. Abangay, Pototan.
Ang manghod niya nga lalaki ang naga-drive sa angkar-angkar, samtang ginasapnay ang biktima sang iya magulang nga lalaki.
Samtang nagapakadto sa ospital, nagaguwa sa imbestigasyon sang kapulisan nga nag-overtake ang angkar-angkar sa ginasundan nga salakyan.
Pero sang yara na sa pihak nga lane sang dalan, nakabunggo ini sa kasugata nga Nissan Navarra. Tungod sa impact, nagtabog ang driver sang angkar-angkar kag ang magulang nga nagasapnay sa biktima.
Nabilin naman sa sulod sang angkar-angkar ang biktima sang natabo ang aksidente. Pareho nga gindala sa ospital ang tatlo pero gindeklarar nga dead-on-arrival sanday Reymark kag ang iya magulang. Padayon naman nga ginabulong sa ospital ang manghod. — Aksyon Maria Kayla Tingzon
