ILOILO — Na-recover ang P5 million nga balor sang suspected shabu, mga pusil kag granada sa drug buy bust operation sa Barangay Tinocuan, Dingle kahapon, Agosto 23.
Subjects sa operation sanday Niel Bedrijo Brijildo, Ben Padojinog Bedrijo, kag John Lagartona Francisco nga mga residente sang nasambit nga barangay; Francis Jaleco Buenavides sang Barangay Dawis, Dingle; kag Jerry Espia Brijildo nga taga-San Ildefonso, Bulacan.
Suno kay Police Major Dadje Delima, head sang Provincial Drug Enforcement Unit (PDEU), nagahalin ang supply sang illegal drugs sang subjects sa syudad sang Iloilo kag Antique.
Anum ka sachets kag anum man ka dalagko nga pinutos sang suspected shabu nga ginabanta nagabug-at 740 grams ang nakuha sa operation.
Magluwas sa illegal nga druga, na-recover man ang long barrel homemade 12 gauge shot gun, homemade AR 15-9mm rifle, ginapatihan airsoft rifle kag M67 grenade.
Sa pagpangusisa sang police, wala sang lisensya ang amo nga mga pusil. — Aksyon Maria Kayla Tingzon/Robert Nietes
