ILOILO CITY — ILOILO CITY— Liwat nga may nagluntad nga rambol sa Gaisano ICC grounds sakop sang Brgy. San Rafael, Mandurriao las-4 kaina sang kaagahon.
Suno kay alyas Kai, 19-anyos nga taga-Molo, halin sila sa ilimnan sa sulod sang Gaisano ICC compound upod ang ginabanta 15 nila ka mga abyan nga ginalakipan sang duha ka mga babaye sang nagdesisyon nga magbalik na sa hotel nga ila tulugan.
May ginselebrar lang ang mag-abyan sa G-Park.
Ginsaysay ni Kai nga pag-abot nila sa atubang sang Gaisano ICC grounds kag manugsakay na kuntani sa taxi, ginli-ab sang wala makilala nga lalaki ang upod nila nga si John, 19-anyos.
Sa nabatian ni Kai, ginkomprontar sang suspek si John kon ngaa masakit ang iya panulok sa ila upod.
Wala pa nakasabat si John pero ginpulihan na siya kastigo sang masobra lima ka mga lalaki, suno kay Kai.
Ginbutong nanday Kai ang ila mga upod nga babaye agud mapahigad samtang may duha sila ka upod nga nagbulig tambag sa natabo pero nakastiguhan man.
Ginbuligan sang iban pa gid nga mga tawo ang apat nga ginakastigo tubtob nagginamo na kag nagpalagyo sa wala mahibaluan nga direksyon ang mga suspek.
May nag-report sa pulis kag ginpangita ang mga suspek pero wala sila sang may nadakpan.
May nadulaan pa sang IPhone 15 pro, suno kay Kai. — Aksyon Farrah Mae Morano
