ILOILO — Na-recover ang P1.7 million nga balor sang suspected shabu kag pusil sa drug buy bust operation sa Barangay Ilajas, Dingle kahapon, August 30.
Subjects sa operation sanday Romy Dubalan Jumabong, 46-anyos nga taga-Barangay Agsalanan; Pol Villegas Gloria, 50-anyos sang Barangay Licu-an kag driver sang Dingle LGU; kag Rofelio Hilada Lagumbay, 49-anyos nga residente sang amo nga barangay.
Suno kay Police Major Dadje Delima, head sang Provincial Drug Enforcement Unit (PDEU), sa mga nagkaladakpan pa nagakuha sang illegal nga druga ang subjects nga nakuhaan sang P5 million nga balor sang suspected shabu sang tinalikdan nga semana sa Barangay Tinocuan kon maubusan sang supply.
Sa monitoring sang police, sa Metro Manila ang source sang illegal nga druga sang mga subjects.
Nakumpiskar sa subjects ang tatlo ka sachets kag tatlo man ka dalagko nga pinutos sang suspected shabu nga ginabanta nagabug-at sang 250 grams.
Nakuha naman ang .38 caliber revolver sa posesyon ni Jumabong.
Gin-conduct ang drug buy bust operation sang Provincial Drug Enforcement Unit (PDEU) sa koordinasyon sang Provincial Intelligence Unit (PIU) kag Dingle Municipal Police Station. — Aksyon Maria Kayla Tingzon
