ILOILO — Napilasan sa tiyan kag dughan ang 45-anyos nga lalaki sang nabun-an sang iya 72- anyos nga amay sa Brgy. Isian Norte, Leon sang Agosto 30.
Suno kay Police Captain Martin Pugales, officer-in-charge sang Leon Municipal Police Station, hubog ang bata sang nagpauli.
Sa imbestigasyon sang police, samtang nagapahuway sa terasa ang amay, ginlampos sang bata ang gate nga himo sa sin sang nagsulod siya.
Ginpamangkot sang amay kon ngaa ginlampos niya ini apang nagsabat ang bata nga “tulog ta ah.”
Pahayag sang police, ginhambalan sang amay ang bata nga magpauli na sa iya payag kag magtulog apang hinali lang siya ginsumbag pero wala naigo.
Nakit-an sang amay nga may kutsilyo sa bag ang iya bata gani ginkuha niya sa kabalaka nga gamiton batuk sa iya.
Nagpukutay ang mag-amay samtang nag-agaway sang kutsilyo nga nagalaba sang 12 inches. Ang amay ang naka-uyat sa uluyatan sang kutsilyo.
Sang nagdumugay ang duha, nabuno sang amay ang bata nga yara sa iya ibabaw. — ARI trainee Robert Nietes
Padayon nga ginabulong sa Western Visayas Medical Center ang bata.
Yara naman sa custodial facility sang Leon Municipal Police Station ang amay.
