ILOILO — Dead on arrival sa ospital ang duha ka tuig nga bata nga lalaki sang nalumos sa talamnan sa Barangay Cadagmayan Sur, Sta. Barbara mga la-1 subong nga hapon.
Suno sa attending physician nga si Dr. Sandra Joy Umadhay Mayoho, wala na sang pulso kag nagapalangit-um na ang bata pag-abot sa ospital.
Gintinguhaan pa nila nga i-revive ang bata pero wala na natabangan.
Suno kay Kagawad Rose Ann Esquillo, posible wala natalupangdan sang lolo nga nagguwa ang bata sa ila balay kag nagdiretso sa talamnan sa atubang lang nila.
Sang nanotisyaran sang lolo nga wala na ang iya apo, nagpangayo siya sang bulig sa pagpangita sa bata.
Las-2 subong nga hapon sang nakita sa talamnan ang bata nga nagatakilid kag nagapalangit-um na.
Lapaw sa kahon ang tubig sa talamnan tungod sa mamunog nga ulan, suno sa kagawad. — Aksyon Maria Kayla Tingzon
