ILOILO CITY — Arestado ang magtiyo nga taga-Molo sang nadakpan sa buy bust operation sang Regional Police Drug Enforcement Unit (RPDEU) 6 sa Brgy. San Jose, Arevalo kaina sang aga.
Main subject sa operasyon ang magtiyo nga ginkilala kanday alyas Babe,24-anyos kag alyas Kim, 40-anyos. Lakip man sa nadakpan ang tatlo pa ka mga indibidwal nga kanday alyas John; kag alyas Earl, alyas Totoy nga mga menor-de-edad.
Na-monitor paagi sa confidential informant ang ilegal nga aktibidad sang magtiyo tubtob nga naka-establisar sang direkta nga koneksyon kag nadakpan sang kapulisan.
Suno kay Police Major Marvin Villanueva, deputy chief sang RPDEU 6, ginakabig nga high value drug personality ang magtiyo nga base sa monitoring sa Iloilo City ang kalabanan sa ila ma-transaksyon.
Ginpahayag ni Villanueva nga gina-verify nila ang impormasyon nga sa New Bilibid Prison nagahalin ang source sang illegal drugs sang magtiyo tungod may paryente sila nga nakaagi napreso.
Magluwas sa magtiyo, may na-recover nga sachet sang suspected shabu kanday John kag Totoy.
Naglab-ut sa P1.3 million ang balor sang suspected shabu nga na-recover sa operasyon. — Aksyon Paula Elambayo
