ILOILO CITY — Arestado ang call center agent sa buy bust operation sang Iloilo City Drug Enforcement Unit (CDEU) sa Brgy. Airport, Mandurriao subong nga gab-i.
Taga-Brgy. Balabag, Sta. Barbara ang subject nga call center agent sa Mandurriao.
Suno kay Police Captain Roque Gimeno III, officer-in-charge sang CDEU, ginbuyagyag sang subject nga may ginakuhaan siya sang supply sang illegal drugs sa Brgy. Bakhaw kag Brgy. Tabucan sa Mandurriao.
Base sa monitoring, ginatipon sang subject ang kuwarta sang mga customers niya antes magkadto sa Bakhaw ukon sa Tabucan agud magbakal sang illegal drugs.
Dugang pa ni Gimeno, nagagamit sang suspected shabu ang subject antes mag-rap sa mga fliptop battle sa Iloilo City.
Na-monitor ang ilegal nga aktibidad sang subject tungod sa confidential informant.
Na-recover ang P374,000 nga balor sang suspected shabu sa subject. — Aksyon Paula Elambayo
