ILOILO — Gindala sa ospital ang buhi nga lapsag nga lalaki sang nakit-an sa abandonado nga tangkal sa Brgy. Anonang, Leon las-8:30 kaina sang aga.
Suno kay Police Lieutenant Mark Cortez, deputy chief of police sang Leon Municipal Police Station, may baklon kuntani sa guwa ang residente nga nakakita sa lapsag sang nabatian nga may nagahibi.
Tungod sini, ginkadtuan sang residente kag nakit-an ang lapsag nga wala sang panapton nga may inunlan pa.
Pasado las-10:30 kaina sang aga sang na-report sa police station ang natabo.
Estable na ang kondisyon sa ospital sang lapsag nga lalaki.
Suno sa barangay health worker nga si Mrs. Ma. Teresa Cabrestante, ginkadtuan siya sang tiyo sang iloy nga nakakita sa lapsag gani ginpadulungan niya agud ma-check.
Pag-abot niya, nagapalanggit-um na ang lapsag kag gin-utod na sang nakakita ang pusod niya.
Ginpatiti sang nakakita ang bata gani nag-untat sa paghibi.
Tungod wala sang opisina ang Municipal Social Welfare and Development Office (MSWDO) kag under construction ang birthing center, gindala sa Aleosan District Hospital ang lapsag.
I-monitor ang bata sa sulod sang pito ka adlaw kag magabulos-bulos sila nga mga BHW sa pagbantay.
Sa tion naman nga makaguwa ang lapsag, i-turnover siya sa kustodiya sang MSWDO. — Aksyon Paula Elambayo/Maria Kayla Tingzon
