ILOILO CITY — Nagpanindugan si Mayor Raisa Treñas nga dapat may manabat sa palpak kag delayed nga flood control projects nga ginabasol sa malapnagon nga pagbaha sa Iloilo City kon mag-ulan.
“Kon may palpak kag delayed nga proyekto kaupod sang flood control nga ang rason sang pagbaha diri sa siyudad, dapat may manabat,” suno kay Mayor Treñas sa iya State of the City Address (SOCA).
Ginpabutyag sang alkalde nga gina-abi-abi niya ang direktiba ni President Ferdinand Marcos, Jr., nga dapat may koordinasyon sa local government units (LGUs) ang national government agencies antes ang pagpatuman sang proyekto.
Ini agud masiguro nga epektibo ang proyekto kag makabenepisyo ang mga pumuluyo.
Ginpasalig man sang alkalde sa mga Ilonggo nga nagatinguha ang city government nga masolusyonan ang problema sa pagbaha sa siyudad.
Ginatrabaho na suno sa iya, ang Comprehensive Drainage Master Plan nga ginalauman daku ang mabulig sa pagbaha. Sa pagkamatuod, nag-meeting na ang city government sa mga experto kag scientists agud maplastar ang mahapos himuon nga solusyon.
Kahapon, madamo ang nabahaan kag na-stranded sa mga dalanon sang ginbaha ang madamo nga lugar makaligad ang manunog nga pag-ulan.
