ILOILO — Na-recover ang P2,040,000 nga balor sang suspected shabu sa lima ka mag-abyan sa buy bust operation sang Provincial Drug Enforcement Unit (PDEU) sa Brgy. Agutayan, Sta. Barbara sang Oktubre 17.
Main subject sa operation kanday alyas Junel sang amo nga lugar kag alyas Libat sang Passi City nga ginakabig high value drug personality. Lakip sa nadakpan kanday alyas Tisoy kag alyas Kulot sang Pavia kag alyas Maymay sang Leganes.
Suno kay Police Major Dadje Delima, head sang PDEU, naaktuhan nga naga pot-session ang mag-abyan sang natabo ang operasyon.
Magluwas sa ginabanta 300 grams nga kabug-aton sang suspected shabu, na-recover man ang .22 caliber revolver kag pito ka bala sa mga subject.
Ginabaligya sa probinsya sang Iloilo ang illegal nga druga sang mga subject. — ARI trainee Robert Nietes
