ILOILO — Dead-on-arrival sa ospital ang driver sang motorsiklo samtang ginbulong pa sa ospital ang iya angkas pero napatay man sang nakabunggo sa naga-park nga truck sa higad sang dalan sa Barangay Dawis, New Lucena Oktubre 25 sang kaagahon.
Suno kay Police Liuetenant Ma. Irene Habuyo, officer-in-charge sang New Lucena Municipal Police Station, halin sa Barangay Jamabalud, Pototan ang magkasilingan nga alyas Remly, 31-anyos nga amo ang driver sang motorsiklo kag Josel, 28-anyos iya angkas, kag pakadto kuntani sa Barangay Dawis sang amo man nga banwa sang nakabunggo sa truck nga may karga nga tubo nga yara sa higad sang dalan.
Sa likod nga porsyon sang truck nakabunggo ang motorsiklo gani nagsuhot sa idalom sang truck ang driver kag iya angkas.
Nakaagum sang head injury ang driver samtang sa gusok ang pilas sang iya angkas nga gintunaan sang ila kamatayon.
Wala sang suksok nga helmet ang mga sakay sang motorsiklo.
Sa pagpangusisa sang pulis sa pamilya sang mga napatay sa aksidente, halin sila sa namatyan pero wala man naka-inom.
Ginalantaw sang pulis nga wala natalupangdan sang mga sakay sang motorsiklo ang truck bisan may napahamtang man nga early warning device.
Sang natabu ang aksidente yara sa sulod sang truck ang driver pero wala siya nagpanaog tungod ginkulbaan.
Naaberiya ang truck tungod naubusan sang gatong. Sirado na ang mga gasoline station kagab-i kag hulaton na lang kuntani sang truck driver mag-aga agud makapatughong. — Aksyon Maria Kayla Tingzon
