ILOILO — Patay ang isa sa duha ka mag-abyan samtang pilason ang isa pa sang gintiro samtang nagabayle sa Barangay Tabunan, Lemery las-2:20 kaina sang kaagahon.
Suno kay Police Captain John Robles, hepe sang Lemery Municipal Police Station, suspect si alyas Ramy, 33-anyos, samtang biktima ang mga abyan niya nga kanday Erald kag Danny.
Sa pagpangusisa sang pulis, nagasaot kanday Erald kag Danny sang gintiro ni Ramy.
Nakabati sang apat ka lupok ang mga tawo sa baylehan. Sang ginproseso sang Scene of the Crime Operatives (SOCO) ang gintabuan sang insidente, isa ka basiyo sang 9mm nga pusil ang nakita.
Patal nga pilas ibabaw sang wala nga dulunggan ang ginkapatay ni Erald. Samtang padayon nga ginabulong sa ospital si Danny nga may pilas sa dughan kag tiyan.
Nagpalagyo pakadto sa Maayon, Capiz ang suspect nga nadakpan man sang mga pulis.
Piyesta sa nasambit nga Barangay Tabunan, Lemery gani nanghagad ang suspect nga maglagaw pagkatapos nila inom sa okasyon nga ila ginkadtuan sa Barangay Velasco.
Ginpabutyag ni Robles nga may nagapatrolya nga mga pulis pero natabuan nga didto sila sa Barangay Gerongan nga nagaselebrar man sang kapiyestahan.
Sang ginpamangkot ang suspect kon ano ang nagtulod sa iya para tiruhon ang iya mga abyan, nagpamalibad siya sa pagsabat.
Ginsugid man sang suspect nga may gina-inom siya nga maintenance tungod ginresetahan sang doktor sang na-diagnose nga may mental health condition.
Ginalantaw sang pulis nga daan nga hiligut-anon ukon ang ginasuprer nga mental health condition sang suspect ang nagtulod sa iya para tiruhon ang iya mga abyan.
Pasakaan sang kaso nga murder kag frustrated murder ang suspetsado. — Aksyon Maria Kayla Tingzon
